Lara Méndez insta a Candia a "pedir perdón" tralo peche da operación Pulpo e esta evita responder

A socialista Lara Méndez instou á popular Elena Candia a "pedir perdón" tras o peche definitivo da operación Pulpo, ao que esta evitou responder desde a mesa do Parlamento, no transcurso do pleno. "Señora Candia, pode aproveitar a intervención, por alusións, para pedir perdón, xa non só ao señor Besteiro, senón a eses centos de funcionarios que se viron implicados inxustamente, tendo un dano persoal", destacou Méndez na súa quenda, durante unha comparecencia da conselleira de Medio Rural sobre o sector.

Pola súa banda, Candia, que exercía como presidenta da mesa en funcións ante a ausencia de Miguel Santalices, só tomou a palabra para pedir aos grupos que "non interrompan á señora Méndez" e "que teña silencio para poder intervir". "Un dano persoal e familiar terrorífico, sen entrar no custo económico que supuxo toda esa armazón que quedou en absolutamente nada", proseguiu a agora deputada do PSOE galego, no seu día alcaldesa de Lugo. "A única persoa que foi sancionada nese proceso foi unha xuíza", engadiu, en referencia a Pilar de Lara. "Silencio, por favor", volveu a dicir Candia, ante o ruído das bancadas populares. "Moléstalles?", replicou Lara Méndez: "É a realidade. Uns premian e nós expulsamos", incidiu.

E é que a socialista comezara o seu discurso asegurando que o PP "premia" os casos relacionados coa corrupción, e afirmou que no Parlamento está "o exemplo máis palpable", pola "señora Candia", que "vai con anónimos ao xulgado e en contraprestación", ao seu xuízo, obtivo "a cadeira da vicepresidencia da mesa do Parlamento". "Déixenlle falar á señora Méndez, por favor", sinalou nese momento Candia, quen unicamente interveu para instar os grupos a que a deixasen falar "con liberdade".

"Esta é a realidade. Mentres vostedes premian esas praxes, nós expulsámolos. Mentres vostedes machucan ordenadores, nós cambiamos contas para que non poidan borrar nin un só dato e que se descubra toda a verdade", contrapuxo, traendo a colación o caso Koldo. Ademais, Lara Méndez subliñou que "todo o caso da operación Pulpo, que se pechou recentemente, non só afecta a políticos, tamén a centos de decenas de funcionarios da Deputación". "Toda esa trama que houbo facendo dano ás institucións, e nin unha soa palabra de perdón", recriminou.

Lara Méndez (PSdeG) e Elena Candia (PPdeG), no pleno do Parlamento | Fonte: PSDEG