As comunicacións por estrada e tren coa meseta cortadas na provincia de Ourense
Máis de 1.000 vehículos retidos na A-52, cortada entre Xinzo e Benavente. A Garda Civil pide responsabilidade
Por Europa Press / Redacción | SANTIAGO DE COMPOSTELA | 14/08/2025 | Actualizada ás 19:57
A autovía A-52, que une Galicia con Castela e León, atópase totalmente cortada desde Xinzo a Benavente pola onda de incendios sen control que afecta á provincia de Ourense. Ante isto, a Garda Civil emitiu un comunicado e fixo un chamamento á sociedade a ser responsables e detallou que hai máis de 1.000 vehículos retidos.
Durante a xornada deste xoves os incendios provocaron cortes en varios puntos da autovía das Rías Baixas, así como na N-525. Así mesmo, a circulación de trens entre Galicia e Madrid está cancelada para o resto do día debido á vaga de incendios.
A este caos circulatorio súmsase tamén a paralización do servizo ferroviario entre Galicia e Madrid, debido, tamén aos numerosos incendios que afectan á provincia de Ourense.
OPERACIÓN SAÍDA
De feito, os incendios seguen complicando o inicio da Operación Saída, con 12 estradas cortadas, segundo informa a Dirección Xeral de Tráfico (DXT) no seu boletín das 18:00 horas. Unha das estradas afectadas é a A-52, tanto na provincia de Ourense, na zona da Gudiña, en ambos os sentidos, como na provincia de Zamora, en Robleda, neste caso dirección Ourense. As outras once vías afectadas son secundarias.
