Volven os berros da deseperación: "Lumes Nunca Máis"

Decenas de persoas manifestáronse en Ourense ao berro de "lumes nunca máis" nunha nova xornada de incendios na provincia. Na concentración, convocada por Amigas dás árbores, reivindicouse un "monte galego con futuro".

A calor non freou aos ourensáns, que acudiron á Praza Maior da cidade, cuberta de cinzas a modo de protesta, a mostrar a súa solidariedade co persoal de extinción, así como o seu rexeitamento aos incendiarios. Nesta liña, comezouse rendendo un minuto de silencio e reflexión polos bombeiros feridos e os dous homes falecidos en León. Tras el, xurdiron diversos berros en defensa do ecosistema galego. "A Xunta é responsable do noso inferno", salientaron.

Así mesmo, redactouse un manifesto no que lamentan os "miles de hectáreas arrasadas, calcinadas sen ser capaz de facerlle fronte ao lume. "Gran parte destes espazos quedarán tinguidos de negro, en forma dun 'Prestige de interior' que vai deixar tras de si unha paisaxe desoladora e unha terra devastada" subliñan.

Tamén remarcaron que "xa abonda de tanta manipulación e de propaganda baleira sobre o rural", xa que "non queren que o monte sexa pasto do lume e a especulación". Por iso, esixiron de novo o "reforzo especial" dos dispositivos de prevención e extinción nos espazos naturais de "maior valor" ecolóxico e ambiental; a creación dun único servizo público de prevención e extinción.

Ademais da declaración de 'zona catastrófica' das áreas afectadas; accións inmediatas nas zonas queimadas; a suspensión da tempada de caza e pesca para rexenerar as poboacións salvaxes, e a creación de políticas estruturais que "preserven a biodiversidade".  Con todo, concluíron mostrando o seu apoio ás poboacións afectadas asegurando que "non están soas".

Manifestación en Ourense contra os incendios | Fonte: Europa Press