O gando queda sen forraxe tras os lumes e Unións Agrarias pide á Xunta "flexibilidade" para a produción ecolóxica
Faino, explica, pola "imposibilidade de cumprir cos cocientes" que se fixan para a alimentación do gando tras os incendios deste verán.
Por Europa Press / Redacción | SANTIAGO DE COMPOSTELA | 09/09/2025 | Actualizada ás 13:14
Unións Agrarias solicitou á Consellería de Medio Rural que se "flexibilice de maneira transitoria" a normativa que rexe a produción ecolóxica. Faino, explica, pola "imposibilidade de cumprir cos cocientes" que se fixan para a alimentación do gando tras os incendios deste verán. Nun comunicado, expón que o Regulamento Europeo establece a posibilidade de adoptar "normas excepcionais" para permitir que a produción ecolóxica "prosiga a súa actividade ou a renove en caso de circunstancias catastróficas".
A organización agraria lembra que a vaga de incendios que arrasou gran parte da provincia de Ourense e outras comarcas de Galicia nas últimas semanas supuxo a perda da produción forraxeira de explotacións gandeiras e da superficie pecoreada polas abellas. Así, asegura que "o nivel de perda foi tan elevado, nalgúns casos a totalidade da superficie propia, que a Consellería de Medio Rural dispuxo un dispositivo de emerxencia para garantir a subministración inmediata de alimento para os animais das explotacións gandeiras afectadas os incendios forestais".
Neste contexto, engade, as explotacións inscritas no Consello Regulador da Agricultura Ecolóxica de Galicia (CRAEGA) teñen "serias dificultades para abastecerse neste momento de alimentación ecolóxica". Apunta que "se atopan nun camiño sen saída dado que o incumprimento da normativa implica a perda da certificación no CRAEGA e ademais dos compromisos e requisitos da Política Agrícola Común (PAC) referidos a xestión agroambiental en agricultura ecolóxica".
