Galicia liderará o crecemento do PIB per cápita en España ata 2026

BBVA Research prevé que Galicia lidere o crecemento do PIB per cápita en España no período 2019-2026, grazas ao incremento da produtividade a un ritmo superior ao doutros territorios. Non obstante, tamén anticipa unha certa desaceleración da economía galega, cun aumento do 2,3% en 2025 que baixará ata o 1,8% en 2026.

Segundo o informe presentado pola directora territorial noroeste de BBVA, Guadalupe Hernández, e polo economista xefe para España, Miguel Cardoso, o PIB per cápita galego medrará un 2% en 2025 e un 1,5% en 2026, situándose a finais dese ano 10,5 puntos por riba dos niveis de 2019. Neste escenario, a taxa de paro reduciríase ata o 8,6% e crearíanse 29.500 empregos no bienio 2025-2026.

O servizo de estudos sitúa a Galicia “inmersa nun proceso de converxencia”, apoiada polo gasto público e polos fondos europeos, así como polo consumo das familias e a mellora da competitividade derivada do menor custo da enerxía e da caída da inflación. Con todo, tamén advirte de factores que poden frear este avance, como os aranceis de Estados Unidos, a falta de man de obra, o déficit de vivenda ou a contracción da industria e das exportacións a Francia e Alemaña.

O informe sinala ademais o impacto negativo dos incendios forestais, especialmente en Ourense, que provocaron caídas de ata un 15% no gasto turístico. Pola contra, identifica oportunidades ligadas ao investimento en renovables e á redución do custo enerxético. Guadalupe Hernández destacou a resiliencia da economía galega e ratificou o compromiso de BBVA de acompañar á comunidade no actual contexto.