Galicia é das comunidades onde se fan "máis horas extra" denuncia CCOO
Comisións Obreiras apunta os datos do estudo "evidencian a persistencia de prácticas empresariais que vulneran o dereito á compensación económica ou en tempo de descanso"
Por Europa Press / Redacción | SANTIAGO DE COMPOSTELA | 09/10/2025 | Actualizada ás 15:36
Comisións Obreiras (CC.OO) destacou que Galicia é unha das comunidades onde se fan "máis horas extra", segundo un informe elaborado a partir dos microdatos da Enquisa de Poboación Activa (EPA), con respecto á distribución das horas extraordinarias en España durante 2024.
Tal e como trasladou o sindicato nunha nota de prensa, o ano pasado fixéronse en Galicia 253 335 horas extras pagas, realizadas por 29 600 persoas, e 175 918 horas non pagas, a cargo de 23 209 persoas.
Isto, sinalou, significa que cada traballador completou unha media de 8,6 horas pagas e 7,6 non pagas. No caso das persoas que realizaron horas extras pagas, cabe destacar que supoñen o 3,16% da poboación asalariada galega, de algo menos dun millón de persoas (935 188), mentres que as non pagas representan o 2,48%.
Segundo CC.OO, Galicia representa aproximadamente o 5,07% do total das persoas asalariadas en España, pero contribúe cun 6,32% das horas pagas e cun 6,46% das horas non pagas a nivel estatal. No caso das horas non pagas, só Madrid, Cataluña, a Comunidade Valenciana e Andalucía rexistran cifras máis elevadas que en Galicia.
Neste contexto, Comisións Obreiras apuntou que os datos do estudo "evidencian a persistencia de prácticas empresariais que vulneran o dereito á compensación económica ou en tempo de descanso".
Con todo, o sindicato instou a "reforzar os mecanismos de control e inspección". Así mesmo, lembrou ás persoas traballadoras que poden acudir ao sindicato para recibir asesoramento se cren que se poden estar a vulnerar os seus dereitos laborais.
