A Covid, unha enfermidade "asimilada" xa a unha gripe

Galicia rolda desde setembro os 1.000 casos de Covid-19, unha enfermidade xa asimilada no seu tratamento e repercusión social á gripe común. Segundo os datos facilitados polo Sergas a Europa Press, a domingo 5 de outubro, o número de casos era de 924, baixando desde os 971 de finais de setembro.

De feito, durante este mes a comunidade comezou a rexistrar un número crecente de casos, que pasaron dos 808 aos 1.087 antes de comezar a baixar. O número de persoas hospitalizadas por Covid-19 pasou de 172 a finais de setembro a 146 a 5 de outubro. Delas, só nove están ingresadas en unidades de coidados intensivos.

Socialmente, a Covid-19 xa se asimilou a unha gripe común, grazas en gran parte á vacinación. Precisamente o pasado 29 de setembro arrincaba a campaña de vacinación fronte á gripe e a Covid-19 para os usuarios dos centros residenciais. Estenderase ata o próximo 31 de decembro e levará a cabo de forma progresiva, segundo os distintos colectivos e grupos de idade, ata alcanzar ao conxunto dos grupos de poboación diana.

A primeira das fases de inmunización comeza coa administración da vacina antrigripal reforzada aos usuarios das residencias de maiores e dos centros de persoas con discapacidade da comunidade. O departamento sanitario da Xunta introduce este ano como novidade a ampliación das doses de alta carga aos maiores de 70 anos, tras os bos resultados alcanzados no ensaio clínico 'Galflu'.

A comunidade galega destaca como líder nas taxas de cobertura, tanto no caso da gripe como da covid-19. Así, a taxa de vacinación da gripe en maiores de 65 anos en Galicia alcanzou o 71% de cobertura, fronte ao 58,4% en España.