Rueda destaca o papel “esencial” das mulleres rurais como motor social de Galicia

O presidente da Xunta, Alfonso Rueda, destacou este sábado en Santiago de Compostela o “papel esencial” das mulleres rurais e das asociacións que as representan como “auténticos motores sociais”, ao tempo que reafirmou o compromiso do seu Goberno coas políticas de igualdade no medio rural. Fixoo durante a clausura da Asemblea e Xornada Nacional da Asociación de Familias e Mulleres do Medio Rural (AFAMMER), celebrada baixo o lema ‘43 anos de avance das Mulleres Rurais: Compromiso, Liderado e Empoderamento’.

Rueda puxo en valor o traballo e o compromiso desta organización, fundada en Lugo en 1982, que cualificou como “pioneira en dar voz ás mulleres do rural e en facela escoitar nos principais foros nacionais e internacionais”. Ademais, incidiu na necesidade de seguir avanzando na conciliación e destacou o reforzo da rede de proximidade da Xunta, que conta con máis de 100 casas niño, 140 casas do maior e 51 unidades de atención temperá que chegan a máis de 200 localidades galegas.

Estas iniciativas, explicou o presidente, forman parte dunha “visión integral dun rural vivo, con servizos e oportunidades para desenvolver proxectos vitais e profesionais”. Tamén subliñou o “papel decisivo” das mulleres no sector agrogandeiro, que considerou “esencial” para o desenvolvemento económico e social do campo galego. Xunto a Rueda participaron no acto a vicepresidenta do Parlamento galego, Elena Candia, e a conselleira do Medio Rural, María José Gómez.

A xornada reuniu en Santiago a máis de 500 mulleres de diferentes puntos de España, entre elas a presidenta nacional de AFAMMER, Carmen Quintanilla, quen lembrou que “cada muller que queda no rural é futuro, economía e vida para o seu pobo”. Quintanilla reivindicou o liderado feminino no medio rural e salientou que “as mulleres están máis preparadas que nunca para ocupar o lugar que lles corresponde en todos os ámbitos da sociedade”.