A Xunta pedirá aos gobernos de España e Portugal que aceleren a autorización da AECT da Raia Seca

A Xunta instará os gobernos de España e de Portugal a acelerar a autorización da Agrupación Europea de Cooperación Territorial (AECT) da Raia Seca e Gêres-Xurés, tras analizar este luns o Consello do Executivo galego o informe sobre os avances na constitución do devandito organismo. Tal como apuntou a Xunta, o pasado mes de maio asináronse os estatutos de desenvolvemento por parte das entidades participantes na AECT, a Deputación de Ourense e as Comunidades Intermunicipais do Alto Miño, do Cávado e do Alto Támega e Barroso. Con todo, a pesar de que o texto foi enviado aos ministerios competentes, non se recibiu resposta.

Por este motivo, o Goberno autonómico incluirá este tema nos asuntos a tratar na próxima reunión da Comisión Luso-Española para a Cooperación Transfronteiriza, prevista para o 30 de outubro en Portugal. O obxectivo, segundo subliñou, é instar a ambos os gobernos a que aceleren a autorización desta AECT, como "paso histórico" para incrementar a cooperación con Portugal. Para a Xunta, esta iniciativa parte dunha base "moi sólida", xa que as institucións que a conforman levan colaborando dunha maneira "coherente e activa" desde hai 30 anos.

Rueda tras o Consello da Xunta | Fonte: Xunta de Galicia