Fabiola García di estar "perseguida, sinalada e acosada" pola CIG: "Non me van deter"
Así o sinalou a conselleira de Política Social durante a súa intervención na inauguración do IX Congreso Empresarial Acción e Implicación onde foi recibida por un grupo de sindicalistas ás portas da sede de Afundación
Por Europa Press / Redacción | SANTIAGO DE COMPOSTELA | 21/10/2025 | Actualizada ás 19:15
A conselleira de Política Social e Igualdade, Fabiola García, asegurou que leva meses sendo "perseguida, sinalada e acosada" tras denunciar o cartel "machista e sexista" contra a súa persoa publicado pola Confederación Intersindical Galega (CIG).
Así o sinalou durante a súa intervención na inauguración do IX Congreso Empresarial Acción e Implicación organizado pola Asociación Empresarias Galicia este martes en Vigo, onde a conselleira foi recibida por un grupo de sindicalistas ás portas da sede de Afundación.
"Levo meses sufrindo as consecuencias dunha viñeta machista e sexista contra a miña persoa e polo feito de denunciala, de denunciar á CIG, a todos eses que nos acompañan hoxe na porta deste auditorio, levo moito tempo sendo perseguida, sinalada e acosada. Xa lles digo que non sinto medo. Non me van a amedrentar nin me van a deter", reivindicou García durante o seu discurso no acto.
Todo iso en relación ao cártel que a CIG publicou no mes de febreiro no que reivindicaba máis persoal para residencias de maiores cun debuxo dunha muller sentada nun sofá, a modo de caricatura de Fabiola García, cun bolso de marca e que afirmaba que lle "matan" as rebaixas.
ORZAMENTOS
Entre outros temas, a conselleira falou do proxecto de orzamentos da Xunta para 2026, subliñando que as contas presentadas este luns reafirman o compromiso do seu departamento de garantir as "máximas oportunidades" para as mulleres traballadoras e emprendedoras de Galicia.
Segundo ela, destinaranse case 30 millóns de euros a políticas de promoción da igualdade, un 2% máis, o que permitirá reforzar as políticas do Executivo galego en ámbitos como a conciliación e a corresponsabilidade, "ademais de seguir favorecendo o emprego feminino".
Tal como recolle a Xunta nun comunicado, Fabiola García avogou por seguir dando pasos ata terminar coa brecha salarial e os estereotipos de xénero que aínda persisten no ámbito laboral.
Ela subliñou o papel "fundamental" das mulleres no ámbito empresarial, "onde o seu talento lidera empresas de todos os tamaños e sectores, ademais de achegar valor e competitividade ao desenvolvemento económico e social da Comunidade".
