O PSdeG acusa á Xunta de crear uns orzamentos "raquíticos" e "decepcionantes" para as comarcas

O PSdeG cualificou de "raquíticos" e "decepcionantes" os orzamentos da Xunta para 2026 para as comarcas de Santiago de Compostela, Pontevedra, Ourense, o interior da Coruña e a Costa da Morte. Nunha nota de prensa, o deputado autonómico e secretario xeral do PSOE de Santiago de Compostela, Aitor Bouza, lamentou que, a pesar dos anuncios do Goberno autonómico, "o único que crece" en Galicia, "por desgraza", son os "demandantes de vivenda, os demandantes de axuda á dependencia e tamén os demandantes de atención sanitaria".

"Ao final, todos eses anuncios que vimos durante este fin de semana por parte da Xunta de Galicia non se plasman nos propios orzamentos que se presentan", engade. No referente á comarca de Compostela, Bouza asina que estes non inclúen "grandes obras que se vaian a executar nin tampouco se garanten uns investimentos para que a vivenda, a sanidade ou a dependencia nesta comarca sexan reais e efectivas".

PONTEVEDRA

Noutro comunicado remitido aos medios, o portavoz do PSOE en Pontevedra, Iván Puentes, mostrou a súa "indignación" ante unhas contas que considera "absolutamente raquíticas" para Pontevedra. "Perdemos 30 millóns de euros en investimentos con respecto a 2025", censurou. Así mesmo, lembra que o 90% deste orzamento investidor correspóndese con dúas actuacións, o Hospital de Montecelo e a construción de vivenda pública, que "están financiadas polo Goberno de España nun 64%.

O portavoz do PSOE en Pontevedra cita "ata 15 actuacións que a Xunta comprometeu coa cidade e que ou ben non están contempladas nos orzamentos da Xunta ou ben o están cunha cantidade tan ridícula que resultará absolutamente imposible realizalas en 2026", entre elas a gratuidade do aparcadoiro de Montecelo, as melloras comprometidas nos centros de saúde, a reforma do Hospital Provincial, o dragado do Lérez, a rehabilitación do antigo convento de Santa Clara, a creación da nova residencia universitaria ou o saneamento da ría.

"INSUFICIENTES PARA OURENSE"

Por outra banda, a deputada autonómica do PSOE por Ourense, Carmen Rodríguez Dacosta, asegurou que os orzamentos da Xunta son "insuficientes" para a provincia e que "non dan resposta ás necesidades da cidadanía". As e os socialistas destacan que se tratan unhas contas que, un ano máis, "discriminan á provincia de Ourense" e que están totalmente "baleiros de contido e con ausencia de partidas clave para o desenvolvemento das diferentes comarcas".

"Rueda anuncia aos catro ventos os orzamentos máis altos da historia, pero a realidade é que crecen por baixo do IPC e do crecemento da economía", o que, segundo apunta, "tradúcese en que baixan e non crecen como nos quere facer ver o PP".


COMARCAS DO INTERIOR CORUÑÉS

Noutro comunicado, a tamén deputada na Cámara autonómica Silvia Longueira denunciou que os orzamentos da Xunta para 2026 nas comarcas do interior da provincia da Coruña son "cantidades ridículas ou practicamente inexistentes". Por unha banda, a deputada no Parlamento de Galicia criticou que a Xunta vaia a destinar "apenas 200.000 euros para que Ordes, Frades e Tordoia poidan mellorar o seu saneamento e abastecemento das augas", unha cantidade que considera "ridícula" para unha poboación que "vai en aumento".

Tamén censurou que as contas volvan ser "practicamente inexistentes na comarca de Arzúa", xa que "unicamente Boimorto, cunha cantidade de 100.000 euros para o saneamento das augas", recibe un investimento directo. Advertiu tamén de que "a partida de Sanidade apenas crece en 157 millóns de euros respecto de 2024, o que significa que pagamos máis aos bancos en débeda que o que destinamos á atención primaria".

Tamén a deputada socialista no Parlamento galego Patricia Igrexas lamentou que os orzamentos da Xunta para 2026 "inclúen os compromisos de sempre coa Costa da Morte e Bergantiños que despois non se executan", e cualificounos de "raquíticos e decepcionantes" para estas comarcas.

O deputado socialista Aitor Bouza | Fonte: PSDEG