A Xunta dá 10 días para retirar a pataca en Muxía e tratar de frear a praga da couza guatemalteca
Técnicos da Consellería do Medio Rural pasarán a recollela para a súa destrución.
- Caballero pide "responsabilidades" á Xunta polo avance da praga da pataca
- Crean unha "zona tapón" en Muxía para evitar que se propague a "peste" das patacas
- O alcalde de Muxía pregunta á Xunta "por que fallaron os controis" da praga da pataca
- A “peste das patacas” chega xa á Costa da Morte
Por E.P. | SANTIAGO DE COMPOSTELA | 06/04/2018 | Actualizada ás 17:48
Os veciños de Muxía (A Coruña) terán 10 días desde este sábado para declarar as patacas plantadas e aquelas que se teñan almacenadas, tanto para consumo como de semente, un produto que os técnicos da Consellería do Medio Rural pasarán a recoller para a súa destrución co obxectivo de tratar de frear a praga da couza guatemalteca.
O Diario Oficial de Galicia (DOG) publica este venres a resolución da Dirección Xeral de Gandaría pola que se establecen os prazos para a declaración de existencias de pataca de consumo, de semente e de superficie de pataca plantada na área afectada por esta praga, e para a declaración de superficies de plantación na zona tapón.
Estas declaracións serán as que se teñan en conta despois para facer os pagos correspondentes ás indemnizacións, que serán as mesmas que reciban o resto de afectados nos outros 32 concellos con presenza da couza guatemalteca.
Ademais, nos terreos limítrofes en cinco quilómetros co Concello de Muxía, actualmente declarados zona tapón, os veciños terán que informar as súas plantacións pero só co obxectivo informativo e de control, xa que neste caso non terán que entregar as patacas. Non poderán, en todo caso, trasladarse dun lugar a outro.
En ambos os casos, as declaracións deberán facerse a través dos modelos de documento incorporados como anexos na resolución do Diario Oficial de Galicia. Para facilitar este labor, técnicos de Medio Rural trasladaranse á casa consistorial do municipio de Muxía durante os días en que permaneza aberto o prazo de declaración para atender aos afectados, así como para resolver as súas dúbidas e axudarlles a cubrir a documentación.
Toda esta información xa foi trasladada aos veciños nas charlas que a Consellería ofreceu en todos os municipios da contorna e no que os técnicos especializados resolveron as dúbidas que tiñan os afectados. Do mesmo xeito, a Xunta informou de que se está levando a cabo un trampeo en toda Galicia para detectar a presenza deste insecto para evitar que chegue a zonas produtoras.
