Máis de 60 voluntarios retiran 84 quilos de lixo mariño nas praias de Burela

As praias do Perdouro e da Marosa, no municipio lucense de Burela, foron escenario este sábado dunha nova xornada de limpeza ambiental organizada por Afundación, na que participaron máis de 60 voluntarios e se retiraron 84 quilos de lixo mariño. A actividade, enmarcada no proxecto PLANCTO, supuxo un novo esforzo colectivo por preservar os ecosistemas costeiros galegos, e contou coa implicación de representantes institucionais e do sector pesqueiro.

A xornada comezou ás 11.00 horas cunha charla introdutoria, na que se ofreceron indicacións sobre a extracción segura de residuos e a metodoloxía de clasificación do lixo atopado. Un dos principais obxectivos era garantir que a intervención se realizase sen impacto na contorna natural, e que os datos recollidos puidesen ser utilizados para futuras accións de concienciación e investigación ambiental.

Durante a limpeza, os participantes atoparon unha ampla variedade de residuos, especialmente materiais procedentes da actividade pesqueira, como restos de redes, cordas, cabos, sedelas, escarvadentes de batea, anacos de poliespán e aboias extraviadas no mar. Estes elementos constitúen unha parte importante da contaminación mariña nas zonas costeiras.

Porén, tamén se identificaron residuos alleos ao mar, relacionados coa actividade cotiá terrestre: envoltorios plásticos, botellas e botes de vidro e metal, tapas, tapóns e unha elevada presenza de cabichas de cigarro, das cales se recolleron ata 300 nun só día, segundo os datos facilitados pola organización.

A actividade contou coa participación de representantes institucionais como o conselleiro do Mar, Alfonso Villares, a alcaldesa de Burela, Carmela López, o patrón maior da Confraría, Basilio Otero, e directivos de ABANCA como Zaira Dapena e Carlos Pita, entre outros. A súa presenza serviu para visibilizar o compromiso público e privado coa protección do medio mariño e a importancia de sumar esforzos entre administracións, sector pesqueiro e sociedade civil.

O proxecto PLANCTO, impulsado por Afundación, leva retirado xa máis de 127 toneladas de residuos das costas galegas, grazas ao traballo de voluntarios e centros educativos. Esta iniciativa procura concienciar sobre a problemática do lixo mariño e promover a adopción de hábitos máis sostibles no uso de plásticos e outros materiais contaminantes.

Con este tipo de accións, reforzase o papel do voluntariado ambiental e da comunidade local como axentes activos na conservación do litoral galego, especialmente en zonas tan ligadas ao mar como Burela.