A Xunta lanza un paquete de medidas para o rural cos 'impostos cero' e 'aldeas modelo' á cabeza
O presidente da Xunta "apura" a transposición da directiva europea para garantir uns prezos aceptables dos produtos agroalimentarios e impulsar unha lei de incentivos fiscais para a actividade agrogandeira.
- Emigración, Galicia queda sen a xeración mellor preparada e sen expectativas para o retorno
- Afectados por parques eólicos denuncian os "expolios" das "empresas amigas do PP" sobre o territorio
Por E.P. | SANTIAGO DE COMPOSTELA | 13/02/2020 | Actualizada ás 14:06
O presidente da Xunta, Alberto Núñez Feijóo, anunciou este xoves o impulso dunha batería de medidas co foco no rural galego, á vez que insistiu nos deberes ao Goberno central que xa puxo esta semana en Madrid: "apurar" a transposición da directiva europea para garantir uns prezos aceptables dos produtos agroalimentarios e impulsar unha lei de incentivos fiscais para a actividade agrogandeira.
Para a primeira reunión do Consello da Xunta tras coñecerse que Galicia irá a eleccións o próximo 5 de abril, Feijóo elixiu o Pazo de Quián, en Sergude, que o seu Goberno quere converter nun escaparate" do rural galego e que se centrou neste ámbito. Ao termo da mesma, compareceu co conselleiro do ramo, José González, para detallar as distintas medidas nas que traballa o Executivo.
Feijóo remarcou que "70.000 familias compran, venden e permutan sen impostos en Galicia" e asegurou que o seu Executivo aspira a que se lexisle e "implantar en toda España" o modelo de 'impostos cero' no rural activado en Galicia. Non en balde, deu por feito que, se isto ocorrese, "os problemas do sector gandeiro, forestal e agrario non estarían nas rúas".
Tamén avanzou que a Xunta traballará na recuperación e mobilización de terras agrarias en estado de abandono --pretende recuperar unhas 10.000 hectáreas de media anual--, con medidas, por exemplo, como a creación de 'aldeas modelo'; e que se subscribirá un convenio coas universidades de Vigo e Santiago para realizar un inventario continuado de masas forestais -actualizarase ano a ano--.
Este plan está chamado a sentar as bases dunha información completa e "actualizada", que permitirá traballar en futuras medidas para mellorar, por exemplo, a prevención contra os incendios forestais.
Entre as iniciativas que Feijóo e González concretaron está tamén a "posta en valor" da rede de oficinas agrarias comarcais e distritos forestais de Galicia, onde se realizan labores de asesoramento; así como o investimento de 9,5 millóns de euros para un plan de pastoreo na Comunidade; e un impulso ao selo 'Galicia Calidade'.
