Por Galicia Confidencial | SANTIAGO DE COMPOSTELA | 08/07/2020 | Actualizada ás 21:45
O Colexio Profesional de Xornalistas de Galicia volveu adxuntar ós candidatos das principais formacións políticas unha carta con demandas históricas do colectivo para que, a poucos días das eleccións autonómicas, o vindeiro goberno da Xunta naza "concienciado da necesidade de afrontar con medidas políticas os principais retos do goberno galego".
A misiva recolle demandas históricas nas que os profesionais "volven insistir" ante a inacción rexistrada ata o momento. Entre elas está de particular actualidade a relativa á necesidade de "avanzar na profesionalización e desgobernamentalización" da Corporación de Radio Televisión de Galicia, á que a xunta electoral deu recentemente un toque de atención pola súa cobertura desigual dos candidatos da oposición, en particular no relativo a Ana Pontón.
De xeito paralelo a esta esixencia, o Colexio de Xornalistas demanda desenvolver o Estatuto profesional, "erradicar o machismo nos medios" e desenvolver a cobertura electoral dos distintos partidos de acordo con valores profesionais, no canto de estar esta sometida "aos mesmos criterios mecánicos de reparto da propaganda electoral que determina a Xunta Electoral".
REUNIÓN CON CIUDADANOS E MAREA GALEGUISTA
O Colexio, que destaca a necesidade de "velar polo carácter democrático e plural da información" destacou asemade como esixencia a conformación dun sistema de subvencións "obxectivo" que dea solución ás "deficiencias a nivel de transparencia" que aqueixa o actual, máis adicado ó "mercadeo" cos medios. Estas demandas foron achegas por parte do colectivo ós partidos que concorren ás eleccións do 12X, se ben -segundo indican- tan só conseguiron reunirse con Beatriz Pino (Ciudadanos) e Pancho Casal (Marea Galeguista).
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.