A Asociación Cutural O Castro, Aodemper e o voluntario Abraham Benítez, premios Acción Voluntaria 2022
Teñen como obxectivo premiar a colaboración de distintos colectivos ante a emerxencia sanitaria da covid-19
Por E.P. | SANTIAGO DE COMPOSTELA | 28/12/2022 | Actualizada ás 11:56
A Asociación Cultural O Castro de Vilanova, a Asociación Ourensana de Esclerose Múltiple, Párkinson e Enfermidades Raras (Aodemper) e Abraham Benítez Somoza, voluntario da Asociación Ambar, foron galardoados como os premios Acción Voluntaria, dotados con 4.000 euros en cada categoría.
O Diario Oficial de Galicia (DOG) publicou este mércores a resolución da terceira edición destes premios, nacidos en 2020, que teñen como obxectivo premiar a colaboración de distintos colectivos ante a emerxencia sanitaria da covid-19 e visibilizar o traballo altruísta existente na comunidade.
Na categoría de entidade, o galardón foi para a Asociación Cultural O Castro, de Vilanova, pola súa ampla traxectoria no ámbito do voluntariado cultural, ambiental e de acompañamento das persoas maiores. Así, a Asociación Ourensá de Esclerose Múltiple, Párkinson e Enfermidades Raras (Aodemper) foi premiada na categoría de proxecto de acción voluntaria.
O seu traballo céntrase en tarefas de sensibilización, visibilización e soporte para que as persoas con algunha destas patoloxías poidan ter unha vida activa e conten con axuda para realizar actividades.
Ademais, na modalidade de persoa individual o premio recaeu en Abraham Benítez Somoza, voluntario da Asociación Ambar, que adestra en atletismo a persoas con discapacidade intelectual e promove un estilo de vida saudable para este colectivo.
