18F.- Compromiso por Galicia intégrase en Espazo Común Galeguista, a coalición de Pachi Vázquez, para as autonómicas

Compromiso por Galicia (CxG) integrouse en Espazo Común Galeguista, a coalición de partidos impulsada polo que fose secretario xeral do PSdeG Pachi Vázquez, para concorrer ás próximas eleccións autonómicas do 18 de febreiro. Nunha rolda de prensa ofrecida este venres en Ourense, o fundador de Espazo Común, Pachi Vázquez, deu a benvida a Compromiso de Galicia ao proxecto, integrado por cinco partidos "integramente galegos". Ademais, prevese que esta fin de semana se de a coñecer a incorporación dunha sexta formación ao proxecto.

"Galicia necesita, como xa tivo nalgún momento, unha gran coalición de centro galeguista, con voz propia, cunha axenda galega que marque definitivamente o seu rumbo e nesas estamos", subliñou o político ourensán. Na súa intervención, o que fóra secretario xeral do PSdeG celebrou a incorporación de Compromiso por Galicia coa "vontade de achegar" e subliñou que se trata dun proxecto "realista" orientado para "sementar de face ao futuro".

Con todo, Vázquez sostivo que afrontan o reto electoral con "moitas ganas e moita capacidade". "Unir seis formacións políticas cunha importante implantación local significa unha cousa moi positiva, que é posible conseguir consensos", afirmou. Ademais, puxo en valor o percorrido político de Compromiso por Galicia, que "dá proxección de futuro galego, de futuro europeo" a unha "ilusión de moitos homes e mulleres". "Ten que facer unha forza galega, galeguista e propia que equilibre ás grandes formacións políticas que ven só en Galicia un punto de paso cara a outros obxectivos", apuntou.

Pachi Vázquez sinalou que a coalición seguirá sumando nos próximos días a máis formacións. Todo iso, apuntou, con "luces longas". "Non estamos tan pendentes dun resultado electoral de proximidade, o futuro de Galicia é algo máis alá do próximo mes, son os próximos anos, e aí os galegos e galegas van atopar en nós un compromiso propio de país, centrado e equilibrado", dixo.

Pola súa banda, o secretario xeral de Compromiso por Galicia, Juan Carlos Piñeiro, asegurou que a súa formación defende desde o seu nacemento "un entendemento de todas as forzas galeguistas no espectro de centro". Na súa intervención, lembrou que CxG iniciou a súa andaina en 2012 e que, ao longo deste tempo, foi capaz de facer acordos a "un lado e a outro do espectro político", "ocupando a centralidade". Nesta ocasión, aínda que sinalou que a formación valorou presentarse en solitario, considera que para dar resposta aos problemas estruturais de Galicia é necesario "ser xeneroso" e traballar nun "sistema de sumar".

Piñeiro dixo que se integran na coalición achegando os seus "cadros" e o seu "traballo". "Achegando a nosa representación municipal alí onde a temos co obxectivo de sementar unha iniciativa política que ten que ir enraizando, non porque sexa un capricho, senón porque é unha necesidade do país", afirmou. Tras iso, dixo que estas eleccións "non consisten só en elixir entre "os dous grandes partidos e un partido nacionalista".

"Hai outras opcións que teñen capacidade de decisión no país, imos tomar as decisións en Galicia, preocupándonos polos nosos problemas, pero cun profundo carácter europeísta e cun corte integrador", afirmou. A coalición está formada por Espazo Común, Unidade Local, Compromiso por Galicia, Coalición Galega e Galicia Sempre. Ademais, esta fin de semana darase a coñecer a incorporación dunha sexta formación, tal e como sinalou o propio Pachi Vázquez a Europa Press.