O Goberno pide traballar para non ser a "xeración do plástico" tras a crise dos pélets: "Isto é unha vergoña"

A vicepresidenta terceira do Goberno e ministra para a Transición Ecolóxica e o Reto Demográfico, Teresa Ribera, pediu traballar para non ser "a xeración do plástico", tras a crise dos pélets. "A catedrática de Historia do meu instituto dicía que, co tempo, os arqueólogos do futuro chamaríannos a xeración, a era do plástico, porque se faga o que se faga aparecerán nas escavacións arqueolóxicas restos de plástico. Isto é unha vergoña que debemos evitar e evidentemente é particularmente perigoso no mar pero non só", advertiu Ribeira este martes, durante a súa comparecencia na Comisión de Transición Ecolóxica e Reto Demográfico, no Congreso dos Deputados.

Segundo precisou Ribera en relación coa vertedura de pélets, estímase que "entre 160.000 e 250.000 toneladas" de pequenos pélets de plástico aparecen nas praias cada ano en todo o mundo. Tamén avisou de que se poden atopar nas canles fluviais e "en sitios insospeitados, en forma de nanoplásticos ou microplásticos que acaban incorporándose á cadea trófica". Ante esta situación, a ministra dixo que a "intención" é traballar para "substituír" moitos dos usos destes pélets por outros materiais e, así, "reducir a produción ata a práctica eliminación daqueles que contan con alternativas dun só uso e facelo moi rapidamente".

Tamén insistiu na necesidade de "traballar na mellora das condicións de seguridade no transporte" destes plásticos e, neste sentido, referiuse Ás recentes declaracións do comisario europeo no Parlamento sobre a necesidade de "endurecer" a regulación "para previr a perda de pélets plásticos", xestionando "unha mellora na seguridade do transporte marítimo e a prohibición de transporte en granel".

Neste sentido, apostou por un marco internacional "ambicioso e xuridicamente vinculante", un "Tratado Internacional para a Prevención da Contaminación por Plásticos no mar", que reduza a dependencia de plásticos". "A contaminación por plásticos non entende de fronteiras, afecta a todos os países", subliñou, sinalando que se xeraron "polo menos 139 millóns de toneladas de residuos plásticos" provocando "unha gran afección ambiental en mares, océanos e ríos".

"Os traballos para concluír un tratado global de loita contra a contaminación por plásticos deben levarnos a un acordo exitoso nas seguintes roldas de negociación", indicou, engadindo que "sería ideal poder lograr un acordo para a próxima Conferencia Internacional de Océanos a celebrar en Niza no ano 2025". Ademais, confiou en poder remitir na próximas semana a proposta de ratificación do Tratado Mundial dos Océanos.

A ministra tamén se referiu a que, ademais da lexislación europea que podemos reforzar e ás conversacións que veu mantendo co comisario todos estes días; e da lexislación nacional que evidentemente tamén se debe reforzar e desenvolver; hai que "conseguir un acordo global para que a produción, o transporte de plástico sexa reducido e seguro nos próximos anos". A miña confianza é poder chegar a un acordo antes de 2025, antes da conferencia de Niza sobre o océano", sentenciou.

A vicepresidenta terceira do Goberno e ministra de Transición Ecolóxica e Reto Demográfico, Teresa Ribera, saúda ao deputado do PP Francisco Conde durante a comparecencia da vicepresidenta terceira do Goberno e ministra de Transición Ecolóxica | Fonte: Eduardo Parra - Arquivo