A XXVI Feira do Viño de Valdeorras foi unha das máis exitosas dos últimos anos
Calcúlase que o público asistente puido superar as 3.500 persoas, tendo contabilizado tamén o Consello Regulador que se serviron máis de 22.000 copas de viño na fin de semana do 31 de maio e 1 de xuño. As catas e os obradoiros de cociña esgotaron as prazas e houbo moita presenza de xente nova no evento, segundo sinalou o presidente da D.O. Marcos Prada.
Por Galicia Confidencial | O Barco de Valdeorras | 06/06/2025 | Actualizada ás 20:20
A pasada fin de semana tivo lugar a XXVI Feira do Viño de Valdeorras, celebrada na Praza de Viloira, en O Barco, durante o sábado 31 de maio e o domingo día 1 de xuño.
O balance que dan a coñecer agora dende o Consello Regulador da D.O. Valdeorras é moi satisfactorio. Máis de 3.500 persoas puideron pasar polo recinto feiral e servíronse máis de 22.000 copas de viño amparado, das adegas que estiveron presentes nesta edición. En palabras do seu presidente, Marcos Prada Ginzo, e referíndose á importancia deste evento vitivinícola para a zona, “a feira é a maior expresión do saber facer de viticultores e adegueiros, durante todo un ano, que veñen a amosar os seus tesouros, o seu enorme traballo, o resultado do seu esforzo”.
Prada Ginzo salientou tamén que houbo mestura de públicos diferentes que quixeron visitar a Feira, sendo a participación da xuventude a máis destacada. Nese senso, referiu que “estamos moi contentos da altísima participación, sobre todo da xente xove; enorgullécenos moitísimo que as novas xeracións queiran descubrir o mundo do viño a través dos nosos excelentes brancos e tintos”.
OUTROS DATOS
A organización destacou tamén a rapidez coa que se cubriron as prazas das catas (40 en total) e do showcooking (20 prazas) da Feira, amosando este feito un enorme interese de parciticipación nestas actividades, cun público fiel que en moitos casos repite a experiencia ano tras ano.
E no que se refire á procedencia dos participantes na Feira seica deu froitos o enorme traballo de promoción polo que este ano apostou o Consello Regulador. “Facendo o esforzo de estar presentes nas feiras, organizando eventos nos que sexamos protagonistas e apostando pola formación convertíndonos en partners oficiais da WSET (a entidade formativa máis prestixiosa do mundo do viño), ten que dar os seus froitos, e en boa parte xa os estamos comezando a ver na participación de moita xente doutras provincias ou rexións nesta edición da Feira do Viño de Valdeorras”, explicou Marcos Prada.
BALANCE EXITOSO E MARXE DE MELLORA
Malia o exitoso balance, e a satisfación trasladada dende o Consello Regulador, o seu presidente trasladou tamén que "hai algunhas cousas que se poden mellorar e, de feito, xa estamos dando os primeiros pasos para poder introducir novidades nos seguintes anos”.
