A conselleira de Medio Ambiente di por que non irá ao cumio do clima: "Non queremos que nos traten como nenos"
Ángeles Vázquez defendeu que non se trata dun "capricho" e pregunta que pasou co pacto de 2022, "que non se chegou a desenvolver"
Por E.P. | SANTIAGO DE COMPOSTELA | 10/10/2025 | Actualizada ás 14:33
A conselleira de Medio Ambiente e Cambio Climático, Ángeles Vázquez, confirmou que non acudirán ao Cume do Clima convocada polo Goberno. "Non estamos dispostos a que se nos trate como nenos nin perder o tempo", afirmou.
En declaracións aos medios, defendeu que non se trata dun "capricho" e, máis aló do cume agora convocado, pregúntase (xunto ao resto de comunidades autónomas gobernadas polo PP) que pasou co pacto de 2022, "que non se chegou a desenvolver"; que pasa co Fondo Social do Clima, "que son 9.000 millóns de euros que non están a chegar ás comunidades, a pesar de que Galicia, por exemplo, presentou antes da data límite os seus proxectos"; e que está a pasar coas conferencias sectoriais, "que xa non se están convocando e polo que se están perdendo fondos europeos moi importantes".
"Chega un momento no que, ante unha decisión de carácter unilateral por parte do Goberno central que non beneficia en absoluto ás comunidades, temos que tomar cartas no asunto. Non estamos dispostos a viaxar de Galicia a Madrid ou desde calquera outro punto só para facernos unha foto", aseverou.
Para Ángeles Vázquez, trátase dun problema o "suficientemente serio" como para "sentar coa ministra e o seu equipo, que hai meses que non se fai nas conferencias sectoriais e, a partir de aí, facer unha formulación serio, cunha planificación e un orzamento".
