Por Santi Domínguez | Vigo | 15/03/2011
Que opina sobre o feito de que o seu partido se abstivese na votación do decreto do goberno que condena á nova caixa galega á perda da súa condición de entidade semipública, no mellor dos casos? Que opina sobre o risco real de que nin sequera poidamos “salvar os mobles” e manter unha entidade galega, aínda que sexa mediante un banco asociado?
Até o de agora, sobre este tema, e sobre outros temas relevantes da cidade, a candidata popular non opina. Bendice o que faga o Partido Popular, que en Galiza asegura estar preocupado pola nosa caixa, mentres en Madrid dá carta branca a un decreto feito para entregar o aforro dos galegos e galegas á banca privada. Na mesma liña de evitar asumir responsabilidades, pero desde o outro partido estatal, vemos como hoxe o ministro José Blanco asegura que os problemas da caixa derivan da fusión e non do decreto. Todo o mundo sabe que o decreto do Banco de España o que pretende é rematar coas caixas de aforro para entregarllas á banca privada, diga o que diga o ministro de Fomento.
Como dixen o venres en rolda de prensa: os galegos temos dereito a ter caixas de aforro, como van seguir tendo cataláns e vascos. A batalla aínda non está perdida, e desde logo sería moito máis fácil se as delegacións galegas de PP e PSOE pensasen máis nos intereses do noso país e menos nos intereses dos seus xefes en Madrid.
Milleiros de galegos e galegas manifestámonos onte en Santiago en defensa de Novacaixagalicia. Desde aquí, quixera chamar aos distintos sindicatos, asociacións de empresarios, movementos sociais, asociacións de veciños e outras organizacións a apostar polo futuro de Vigo e de Galiza, que pasa por manter un instrumento fundamental para financiar a economía produtiva e que ademais invisten os seus beneficios en obra social en lugar de repartilos entre accionistas, como son as caixas de aforros.