Unha xestión da que estarmos orgullosos e orgullosas

Pasaron case catro anos desde que o BNG entrou no goberno municipal de Vigo. Catro anos de esforzo, ilusión e compromiso coa nosa cidade e co noso país. Participamos dun goberno orientado polo compromiso con Vigo e con Galiza, desde os nosos valores e principios e desde o compromiso coa cidade e o conxunto de país. Partimos da base que gobernar non é o mesmo que mandar. Gobernar é escoitar á veciñanza, atender as súas demandas, facer fronte ás súas necesidades, ser próximos aos seus problemas, ser transparentes nas nosas actuacións. Agora, chega a hora de facer balance para que os cidadáns escollan.

Por Santi Domínguez | | 25/03/2011

Fixémolo a semana pasada, nun acto conxunto cos socios de goberno. Fixémolo esta semana mediante diversos actos sectoriais nos cales informamos a cidadanía da nosa labor en deportes, cultura, benestar, igualdade, comercio e outras áreas.

Grazas á labor dos nosos concelleiros e concelleiras, en Vigo duplicamos os orzamentos de benestar, puxemos en marcha novas infraestruturas deportivas como as piscinas de Barreiro e da Miñoca ou o pavillón de Navia, garantimos unha programación cultural para todo o ano no Auditorio Municipal, abrimos locais de ensaio para os músicos novos e puxemos en valor o noso patrimonio, reconquistando para a cidadanía o Casco Vello como un lugar para vivir e coñecer. As nosas accións foron avaladas por premios externos, como o premio COCENFE de accesibilidade ou o Premio do Consello Superior de Deportes (o máis importante do Estado).

Pretendemos agora dar contas e seguir escoitando á cidadanía (mediante de ferramentas como a web euparticipoenvigo.org) para seguir construíndo entre todos e todas o Vigo do futuro. Contamos con vós nesta tarefa. Vivimos tempos difíciles, pero desde a confianza na xente, e mediante o compromiso de todos e todas, poderemos enfrontar todos os retos.