Coren fai un chamamento para profesionalizar e optimizar a recollida da castaña

Aínda que inicialmente a colleita de castaña prevíase boa, a calor intensa que se rexistrou en setembro e ata mediados de outubro provocou a perda dunha gran cantidade de froito. En todo caso, Coren traballa na procura de castaña para a alimentación dos seus porcos co obxectivo de repetir o volume de compra de anos anteriores.

Ante esta situación, a cooperativa ourensá fai un chamamento á recollida de toda a castaña, xa que moita queda abandonada nos montes sen recoller, e tamén á profesionalización no sector, co coidado dos soutos galegos e a plantación de variedades de óptimo rendemento. Sinalan tamén, para que se aposte pola castaña galega, que estudos do sector indican que a rendibilidade dunha plantación coidada e con variedades de valor engadido é similar á dunha hectárea de viñedo.

COREN, UN GRAN COMPRADOR DE CASTAÑA

Desde o lanzamento da súa Gama Selecta, Coren é un dos maiores demandantes de castaña en Galicia. O produto adquirido pasa por un proceso de pelado, cocción e posterior conxelado, o que permite a súa conservación co fin de destinar á alimentación dos porcos durante todo o ano seguinte. O importante volume de demanda de Coren desempeña un papel estabilizador no sector, contribuíndo á xeración de riqueza e a dinamización económica do rural, ao complementar os ingresos das familias do campo, ademais de preservar os soutos fronte ao risco de desaparición que sofren polo abandono, o que ten tamén unha importante repercusión ambiental. Unha acción que se enmarca dentro da Política de Responsabilidade Social de Coren de impulsar iniciativas dirixidas a fomentar o progreso da contorna rural no que desenvolve a súa actividade.

PROXECTO SELECTA

Coren cumpre xa unha década como un dos principais demandantes de castaña para a alimentación do seu porco Selecta, proxecto froito dunha iniciativa de I+D da cooperativa dirixida a recuperar a alimentación dos porcos con castaña, como sempre se fixo en Galicia, o que dá un sabor especial á carne.

A gama Selecta de carne fresca lanzouse ao mercado en 2012, e 18 meses máis tarde --no outono de 2013-- saían os primeiros xamóns de castañas. A día de hoxe, a gama está consolidada como unha das máis exitosas da cooperativa, tanto na súa liña de frescos como na de curados, co seu Xamón Selecta “O de Castañas” como referente.