Tradición e modernidade volven a mesturarse en Figa, o novo single de Tangunxeiras
As coplas tradicionais, as líricas propias e as sonoridades electrónicas fusiónanse, coma no caso de Midas, neste novo tema; que se acompañará dun videoclip que as cantareiras estrearán o venres 9 ás 00.00 horas na súa canle de Youtube.
Por Galicia Confidencial | SANTIAGO DE COMPOSTELA | 05/07/2021 | Actualizada ás 22:30
Tanxugueiras lanzará o vindeiro venres, 9 de xullo, o seu novo sinxelo: Figa. As cantareiras dan un novo paso no camiño iniciado o pasado mes de febreiro con Midas e avanzan, firmemente, na súa aposta pola proxección do canto e da música tradicional do país a través da súa reformulación a través da súa confluencia con sonoridades electrónicas.
Figa, cuxo nome remite ao emblemático amuleto contra o mal de ollo, bebe de coplas e simboloxías tradicionais, mesturadas con líricas de creación propia, coa intención de incidir na forza e na capacidade das mulleres á hora de afrontar a súa vida, alén das envexas, medos e críticas derivadas dun sistema marcadamante machista. Con este tema, Tanxugueiras quere rachar novamente cos estereotipos á vez que poñen de manifesto como agroman, desde o máis fondo, o empoderamento, a sororidade e a valentía feminina.
A canción, que estará dispoñible nas principais plataformas dixitais, acompañarase dun videoclip que se estreará o vindeiro venres 9, ás 00:00 horas na súa canle de Youtube.
