Europa entra en economía de guerra con cambios importantes na política ambiental e enerxética
A Eurocamara pide menos obrigas ambientais para proxectos enerxéticos e a tramitación máis rápida de iniciativas dede enerxía limpa. Proxectos mineiros, tecnolóxicos e industriais terán preferencia.
Por Europa Press / Redacción | BRUSELAS | 03/04/2025 | Actualizada ás 21:18
A situación xeopolítica mundial está a cambiar as regras de xogo, especialmente, no ámbito da lexislación comunitaria. Europa, que foi a abandeirada de impoñer leis e esixencias ambientais aos estados membros, pide agora que se relaxen nun contexto internacional e macroeconómico que está a cambiar as bases da actual globalización.
A guerra en Ucrania e o desafío arancelario de Trump están modificando a axenda política, social e económica da UE. O pleno do Parlamento Europeo apoiou a proposta da Comisión Europea de reducir as obrigacións ambientais que esixen ás empresas informar o impacto da súa actividade no medio ambiente para alivialas de carga burocrática, abaratar custos e impulsar a súa competitividade fronte a competidores como China ou Estados Unidos.
Este paquete, que Bruxelas bautizou como 'Ómnibus', afecta a varios marcos regulatorios europeos relacionados coas obrigacións das empresas de dar parte do impacto da súa actividade, algúns dos cales prevén multas e sancións para as compañías que socaven os dereitos humanos e o medio ambiente.
O pleno do Parlamento Europeo tamén reclama unha tramitación máis rápida dos proxectos de enerxía limpa para reforz r a competitividade das industrias con uso intensivo de enerxía e axudalas a realizar a transición cara a procesos industriais limpos. A Eurocámara advirte de que estas industrias vitais para o emprego e a autonomía estratéxica de Europa enfróntanse agora a desafíos a medida que adoptan tecnoloxías máis limpas, polo que destaca a necesidade dunha transición rendible que utilice diversas tecnoloxías para reducir os custos enerxéticos.
Isto terá efectos a curto prazo en proxectos mineiros, tecnolóxicos e industrias. Algo que pode favorecer á Xunta en Galicia con polémicos proxectos que, ou están nos tribunais, como son os plans eólicos e a mina de Touro-O Pino, ou que ameazan con estalo, como a megacelulosa de Altri.
EMISIÓNS EN GALICIA
Por outra banda, as instalacións galegas do comercio de dereitos de gases contaminantes reduciron un 24% as súas emisións en 2024. As máis dunha trintena de instalacións galegas afectadas o comercio de dereitos de emisión de gases de efecto invernadoiro reduciron o ano pasado as súas emisións un 23,7% en relación con 2023.
Segundo datos que expón a Xunta nun comunicado, todos os establecementos industriais que participan neste mercado europeo declararon o ano pasado a emisión de 3,5 millóns de toneladas de dióxido de carbono (CO2), 1,1 millóns menos que o exercicio anterior e a cifra máis baixa da serie histórica (desde 2005).
