Gandeiros galegos piden que as anomalías en mostras de leite tomadas tralo apagamento non penalicen no prezo

Unións Agrarias solicitou ao Laboratorio Interprofesional Galego de Análise do Leite que as mostras obtidas entre este martes e mércores, tras a caída da rede eléctrica na xornada do luns, non sexan tidas en conta para posibles penalizacións no prezo do produto. "Hai algunha industria [dentro do sector] que, por unha mostra cunha bacteroloxía alta, obriga a tirar todo o leite ou a descontar o seu prezo", explicou en declaracións aos medios o secretario xeral de Unións Agrarias-UPA, Roberto García, que cualificou de "actuación rastreira" o suposto no que ese criterio se aplicase para esta situación de excepción.

Estas posibles variacións nos seus valores están suxeitas á alteración da cadea de frío, xa que, nalgúns casos, os gandeiros tiveron que destinar a enerxía da que dispuñan para atender "calquera outra circunstancia grave", como o ordeño. Con todo, García precisou que unicamente se refire a niveis bateriais que non afecten o consumo: "Os tests de control están a realizarse, polo que calquera mostra que teña algún tipo de anomalía que afecte á calidade do leite para o consumo humano seguirá o proceso de penalización".

Aínda que o apagamento causou "importantes perdas" aos agricultores e gandeiros galegos, o representante da entidade destacou que as "explotacións máis competitivas" de leite, carne ou pito estaban preparadas para este tipo de circunstancias, con xeradores ou a utilización da toma de forza dos tractores. Isto débese a "un sistema eléctrico que fallaba con demasiada frecuencia" e que lles obrigou a estar preparados para estas situacións. Ademais, o "grao de solidariedade" tamén se puxo de manifesto ante a caída da rede eléctrica.

O secretario xeral de Unións Agrarias-UPA, Roberto García, en declaracións aos medios | Fonte: Europa Press